Spring Meadows (Manorleigh)

Cartref preswyl bach yn Abertawe yw Spring Meadows (Manorleigh) sy'n cael ei redeg gan deulu ac yn darparu gofal i hyd at wyth oedolyn hŷn ag anableddau dysgu. Mae gan y cartref dîm sefydlog o staff sy'n adnabod y preswylwyr yn dda ac yn eu helpu i ddatblygu sgiliau ymarferol ac annibyniaeth drwy weithgareddau dyddiol pwrpasol.

Mae Spring Meadows yn rhedeg dau gynllun cysylltiedig sy'n troi cyfleoedd dysgu beunyddiol yn falchder, pwrpas ac annibyniaeth. 

• Fy nodau personol: Mae pob preswylydd yn dewis un nod personol ar gyfer y flwyddyn (e.e. gwneud paned o de, dysgu am arian, dewis dillad sy'n briodol ar gyfer y tywydd). Mae'r staff yn adolygu cynnydd gyda'r preswylwyr bob tri mis, ochr yn ochr â'r teulu. Mae pawb yn cael tystysgrifau am ymdrech a chynnydd, gan arwain at noson wobrwyo i ddathlu eu cyflawniadau bob mis Rhagfyr. 
• Blwch post cyflawniadau: Mae'r preswylwyr, y staff a pherthnasau yn ysgrifennu ‘cardiau post cyflawniad’ pa bryd bynnag y bydd unigolyn yn dangos caredigrwydd, yn rhoi cynnig ar rywbeth newydd neu'n gwneud cynnydd. Mae postio'r cerdyn yn eu cymell ac yn cael effaith ar unwaith. Ar ddiwedd y flwyddyn, caiff y blwch post ei agor a chaiff y cyflawniadau eu darllen yn uchel yn y noson wobrwyo. 

Gyda'i gilydd, mae'r cynlluniau syml hyn yn rhoi anogaeth reolaidd, nodau clir a chydnabyddiaeth ystyrlon i'r preswylwyr – gan eu helpu i fagu hyder a meithrin sgiliau. 

• Mae'r cynlluniau wedi gwella hyder a chymhelliant yn y cartref, gyda'r preswylwyr yn cael anogaeth a chydnabyddiaeth reolaidd gan y staff, aelodau o'u teulu a'u cyfoedion 
• Mae'r preswylwyr yn fwy parod i roi cynnig ar bethau newydd, i feithrin sgiliau ac i weithio tuag at fod yn fwy annibynnol 
• Dywed y staff a pherthnasau eu bod yn gweld mwy o falchder, awydd i ymgysylltu a phwrpas ym mywydau beunyddiol y preswylwyr. 

Ochr yn ochr â'r effeithiau cyfunol hyn, mae'r preswylwyr wedi cyflawni cerrig milltir personol:

• Roedd un preswylydd wedi datblygu o fethu ag adnabod darnau arian i dalu'n annibynnol mewn clybiau cymunedol a siopau 
• Mae preswylydd arall a ddewisodd “rhoi cynnig ar bethau newydd” bellach yn mynd i glybiau cymunedol ac wedi gwneud ffrindiau newydd 
• Roedd un preswylydd wedi dysgu sut i ddewis dillad sy'n briodol ar gyfer y tywydd, gan ei helpu i aros yn gyfforddus ac yn iach

Dyw hi byth yn rhy hwyr i ddysgu sgiliau newydd ac i ddod yn fwy annibynnol. Mae pob cyflawniad yn werth ei ddathlu, boed yn fach neu'n fawr!