Defnydd Arolygiaeth Gofal Cymru o Ddeallusrwydd Artiffisial (AI) yn ei gwaith
Mae’r datganiad hwn yn nodi dull Arolygiaeth Gofal Cymru o ddefnyddio deallusrwydd artiffisial yn ddiogel, yn dryloyw ac yn atebol, gan sicrhau bod AI yn cefnogi penderfyniadau dynol yn hytrach na’u disodli
Mae AI yn cael ei ddefnyddio fwyfwy ym maes iechyd a gofal cymdeithasol i wella effeithlonrwydd, dadansoddi gwybodaeth a chefnogi prosesau gwneud penderfyniadau. Er ei fod yn cynnig cyfleoedd i wella gwasanaethau mae risgiau yn gysylltiedig ag ef hefyd y mae angen eu rheoli'n ofalus.
Mae AGC yn dechrau defnyddio deallusrwydd artiffisial (AI) i gefnogi'r ffordd rydym yn gweithio fel rheoleiddiwr. Mae ein defnydd o AI yn datblygu ac rydym yn parhau i brofi a gwerthuso sut y gellir ei ddefnyddio yn ddiogel, yn effeithiol ac yn briodol o fewn amgylchedd rheoleiddio. Wrth i ni fagu mwy o brofiad, byddwn yn parhau i adolygu a diweddaru ein dull gweithredu, ein trefniadau llywodraethu a'n canllawiau er mwyn sicrhau bod AI yn cael ei ddefnyddio yn ddiogel, yn dryloyw ac yn effeithiol.
Sut rydym yn defnyddio AI ar hyn o bryd
Rydym ar gam cynnar a datblygol o ran ein defnydd o AI. Ar hyn o bryd, rydym yn archwilio amrywiaeth o ddefnyddiau posibl ar gyfer AI i gefnogi tasgau gweinyddol a dadansoddol. Mae unrhyw ddefnydd o AI yn parhau i gael ei arolygu a'i oruchwylio gan bobl.
Rydym yn annog ein staff i archwilio a phrofi'r defnydd o adnoddau AI a rhannu'r hyn maent yn ei ddysgu ar draws y sefydliad. Mae hyn yn ein helpu i ddeall:
- ble y gall AI ychwanegu gwerth
- beth yw'r risgiau
- sut y gellir ei ddefnyddio'n ddiogel ac yn briodol mewn cyd-destun rheoleiddiol
Ein dull gweithredu
Rydym yn mabwysiadu dull gofalus a chymesur o ymdrin ag AI drwy wneud y canlynol:
- helpu staff i arbrofi o fewn ffiniau clir
- dysgu o ddefnydd go iawn o AI yn ein gwaith o ddydd i ddydd
- adolygu ein dull gweithredu yn barhaus
Caiff pob defnydd o AI yn AGC ei oruchwylio ac rydym yn parhau i asesu ei effaith ar ansawdd a chysondeb ein gwaith.
Ein hegwyddorion
Fel rheoleiddiwr, rydym yn defnyddio set glir o egwyddorion bob tro y byddwn yn defnyddio AI:
Rhoi pobl yn gyntaf
Mae AI yn cefnogi ein gwaith, ond nid yw'n cymryd lle barn broffesiynol.
Staff AGC sy'n gwneud penderfyniadau terfynol ac yn dod i gasgliadau rheoleiddiol bob amser.
Cywirdeb ac ansawdd
Mae cynnwys a gynhyrchir gan AI bob amser yn cael ei wirio a'i adolygu.
Nid ydym yn dibynnu ar allbynnau AI heb iddynt gael eu dilysu gan bobl.
Tryloywder
Rydym yn agored am y ffordd rydym yn defnyddio AI a ble rydym yn ei ddefnyddio.
Rydym yn agored am y ffordd rydym yn defnyddio AI a ble rydym yn ei ddefnyddio a byddwn yn parhau i gyhoeddi gwybodaeth am ein dull gweithredu wrth iddo ddatblygu. Lle bo'n berthnasol, rydym yn hysbysu pobl pan fydd AI yn cael ei ddefnyddio i gefnogi proses neu weithgaredd, er enghraifft mewn cyfarfodydd.
Tegwch
Rydym yn cydnabod y gall AI gyflwyno tuedd.
Bydd yr arolygwyr yn sicrhau y bydd pob allbwn yn parhau i fod yn gytbwys, yn deg ac yn seiliedig ar dystiolaeth.
Diogelu data a chyfrinachedd
Dim ond i ddiogelu gwybodaeth bersonol a sensitif y byddwn yn defnyddio adnoddau cymeradwy ac yn dilyn gofynion llym.
Atebolrwydd
Mae AGC yn parhau i fod yn gyfrifol am yr holl waith a gynhyrchir gan ddefnyddio AI.
Nid yw cyfrifoldeb byth yn cael ei ddirprwyo i dechnoleg.
Dysgu a gwella
Rydym yn sylweddoli bod technoleg AI yn datblygu'n gyflym. Byddwn yn parhau i brofi, dysgu ac addasu ein dull gweithredu, gan ddefnyddio adborth gan staff, darparwyr, pobl sy'n defnyddio gwasanaethau a sefydliadau partner.
Byddwn yn darparu canllawiau, hyfforddiant a chymorth ymarferol i staff i'w helpu i ddefnyddio AI yn gyfrifol, yn gyson ac yn unol â pholisïau a gwerthoedd AGC.
Edrych i'r dyfodol
Byddwn yn parhau i archwilio'r ffordd y gall AI gefnogi ein gwaith fel rhan o'n strategaeth ddigidol ehangach.
Bydd hyn yn cynnwys:
- meithrin dealltwriaeth gliriach o ble y gall AI wella arferion rheoleiddio
- datblygu ein dull o lywodraethu a rhoi sicrwydd
- helpu staff i ddefnyddio AI yn hyderus ac yn ddiogel
- sicrhau bod ein defnydd o AI yn parhau i gyd-fynd â'n prif ddiben, sef diogelu a gwella gofal
- cynnwys pobl a'n rhanddeiliaid yn y datblygiadau.
- monitro'r ffordd mae AI yn effeithio ar y ffordd y mae gwasanaethau a darparwyr rheoleiddiedig yn cyfathrebu â ni ac adolygu ein canllawiau a'n prosesau lle y bo angen.
Ein nod yw defnyddio AI mewn ffordd sy'n:
- cefnogi gwaith rheoleiddio o ansawdd uchel sy'n canolbwyntio ar yr unigolyn
- gwella'r ffordd rydym yn defnyddio gwybodaeth
- cynnal ymddiriedaeth a hyder y cyhoedd
Ein hymrwymiad
Rydym yn ymrwymedig i ddefnyddio AI:
- yn gyfrifol ac yn foesegol
- yn dryloyw ac â goruchwyliaeth briodol
- mewn ffordd sy'n cefnogi arbenigedd dynol yn hytrach na'i ddisodli
Byddwn yn parhau i rannu'r hyn rydym yn ei ddysgu wrth i'n dull gweithredu ddatblygu.