Arolygiaeth Gofal Cymru yn cyhoeddi ei dull o ymdrin â deallusrwydd artiffisial
Heddiw, mae Arolygiaeth Gofal Cymru (AGC) wedi cyhoeddi dau ddatganiad yn nodi ei dull o ymdrin â deallusrwydd artiffisial
Heddiw, mae Arolygiaeth Gofal Cymru (AGC) wedi cyhoeddi dau ddatganiad yn nodi ei dull o ymdrin â deallusrwydd artiffisial): un sy'n ymdrin â'r ffordd y mae AGC ei hun yn defnyddio AI ac un sy'n nodi ein safbwynt ar y defnydd o AI gan ddarparwyr gofal cymdeithasol.
Mae AI yn cael ei ddefnyddio fwyfwy ym maes iechyd a gofal cymdeithasol i wella effeithlonrwydd, dadansoddi gwybodaeth a chefnogi prosesau gwneud penderfyniadau. Mae'n cynnig cyfleoedd go iawn i wella gwasanaethau ond mae risgiau yn gysylltiedig ag ef hefyd y mae angen eu rheoli'n ofalus.
Mae AGC ar gam cynnar sy'n datblygu o ran ei defnydd ei hun o AI, lle mae'n ystyried ffyrdd y gall gefnogi tasgau gweinyddol a dadansoddol. Mae pob defnydd o AI yn parhau i gael ei adolygu gan bobl ac rydym yn cymhwyso set glir o egwyddorion, sef: rhoi pobl yn gyntaf, cywirdeb ac ansawdd, tryloywder, tegwch, diogelu data ac atebolrwydd. Mae penderfyniadau rheoleiddio ac arolygu yn cael eu gwneud gan staff AGC a byddant yn parhau i gael eu gwneud ganddynt.
Yn achos darparwyr gofal cymdeithasol, nid yw AGC yn cymeradwyo nac yn rheoleiddio adnoddau AI penodol. Yn lle hynny, rydym yn asesu sut mae darparwyr yn defnyddio technoleg, gan gynnwys AI, drwy ein fframwaith rheoleiddio presennol, er mwyn sicrhau ei fod yn cefnogi gofal diogel ac effeithiol sy'n canolbwyntio ar yr unigolyn. Anogir darparwyr i gyfeirio at Ganllaw AI Gofal Cymdeithasol Cymru i weld canllawiau ymarferol ar ddefnyddio AI yn ddiogel ac yn effeithiol.
Gallwch ddarllen y datganiadau llawn drwy ddilyn y dolenni isod.