Datganiad blynyddol
Os ydych yn gweithredu gwasanaeth gofal rheoleiddiedig yng Nghymru, mae'n ofynnol yn ôl y gyfraith i chi gwblhau datganiad blynyddol a'i gyflwyno bob blwyddyn. O 2026, rhaid i chi hefyd gyhoeddi eich datganiad blynyddol ar eich gwefan eich hun.
Ynglŷn â'r datganiad blynyddol
Ffurflen ar-lein y mae'n rhaid i ddarparwyr gwasanaethau oedolion a phlant cofrestredig ei chwblhau bob blwyddyn drwy eu cyfrif AGC Ar-lein yw'r datganiad blynyddol. Mae'n casglu gwybodaeth am eich gwasanaeth, gan gynnwys staffio, nifer y lleoedd, a sut rydych yn darparu gofal. Mae'r wybodaeth hon yn helpu AGC i gynllunio arolygiadau, yn cefnogi tryloywder i'r cyhoedd, ac yn cyfrannu at ddata cenedlaethol ar wasanaethau gofal yng Nghymru. Bydd y cyfnod i ddychwelyd datganiadau blynyddol yn agor ar 1 Ebrill bob blwyddyn.
Beth sy'n newydd ar gyfer 2026
Mae dau newid pwysig i'r datganiad blynyddol eleni.
- Am y tro cyntaf, rhaid i chi gyhoeddi'r datganiad blynyddol a gyflwynwyd gennych ar eich gwefan eich hun erbyn 30 Mehefin 2026. Mae hyn yn ofyniad cyfreithiol newydd o dan Ddeddf Iechyd a Gofal Cymdeithasol (Cymru) 2025. Ni fydd AGC yn cyhoeddi datganiadau blynyddol ar eich rhan mwyach. Os nad oes gennych wefan ar hyn o bryd, bydd angen i chi greu un cyn y terfyn amser hwn.
- O 2026, mae AGC a Gofal Cymdeithasol Cymru yn cyfuno eu prosesau casglu data. Mae hyn yn golygu y byddwch yn cwblhau un datganiad yn lle dwy broses casglu data ar wahân bob blwyddyn. Bydd y data ar eich gweithlu yn cael eu rhannu'n awtomatig â Gofal Cymdeithasol Cymru pan fyddwch yn eu cyflwyno.
Yr hyn sydd angen i chi ei wneud
- Cwblhewch eich datganiad blynyddol a'i gyflwyno drwy eich cyfrif AGC Ar-lein erbyn 26 Mai 2026.
- Lawrlwythwch y ‘copi i'w gyhoeddi’ o'ch datganiad blynyddol o'ch cyfrif AGC Ar-lein.
Noder: byddwch yn cael copi trafodiad o'ch datganiad blynyddol yn union ar ôl i chi ei gyflwyno, ond at ddiben eich cofnodion yn unig y mae'r copi hwn ac ni ddylech ei gyhoeddi ar eich gwefan.
- Rhaid i chi gyhoeddi eich datganiad blynyddol ar eich gwefan eich hun erbyn 30 Mehefin 2026.
Pwy sydd angen cwblhau datganiad blynyddol
Rhaid i chi gwblhau datganiad blynyddol os ydych yn gweithredu un o'r canlynol:
- Gwasanaethau cartrefi gofal
- Gwasanaethau cymorth cartref
- Gwasanaethau llety diogel
- Gwasanaethau canolfannau preswyl i deuluoedd
- Gwasanaethau maethu rheoleiddiedig
- Gwasanaethau mabwysiadu rheoleiddiedig
- Gwasanaethau eirioli rheoleiddiedig
- Gwasanaethau lleoli oedolion
- Gwasanaethau preswyl ysgolion arbennig
Nid oes angen i'r canlynol gwblhau datganiad blynyddol:
- Gwasanaethau maethu awdurdodau lleol
- Gwasanaethau mabwysiadu awdurdodau lleol
- Colegau addysg bellach
- Ysgolion preswyl
Canllawiau a chymorth
Er mwyn eich helpu i gyflwyno eich datganiad blynyddol a'i gyhoeddi, rydym wedi paratoi dau adnodd.
Mae ein Datganiad blynyddol 2026: canllawiau i ddarparwyr ar y datganiad blynyddol yn rhoi trosolwg cynhwysfawr o'r broses, gan gynnwys beth yw'r datganiad blynyddol, pwy sydd angen ei gwblhau, a beth mae'r gofyniad newydd o ran cyhoeddi yn ei olygu i'ch gwasanaeth. Os yw'r datganiad blynyddol yn rhywbeth newydd i chi neu os hoffech ddeall y newidiadau ar gyfer 2026, dechreuwch yma.
Mae ein Datganiad blynyddol 2026: cwestiynau cyffredin yn ymdrin â'r rhan fwyaf o ymholiadau cyffredin am y broses gyflwyno, y gofyniad newydd o ran cyhoeddi, y daenlen am y gweithlu, a beth i'w wneud os nad oes gennych wefan.
Mae'r ddau adnodd ar gael yn y dolenni isod.
Bydd canllaw cam wrth gam ynglŷn â sut i lawrlwytho eich datganiad blynyddol ar gael o ddechrau mis Mai 2026, unwaith y bydd y ‘copi i'w gyhoeddi’ o'ch datganiad ar gael i'w lawrlwytho.
Cysylltwch â ni
Os bydd gennych gwestiwn nad yw'n cael ei ateb yma nac yn y dogfennau ategol, rydym yn fwy na pharod i'ch helpu. Cysylltwch â ni:
- E-bost: agc@llyw.cymru
- Ffôn: 0300 7900 126